Jos 6 | NdeIBE | STEP | IJerikho yayivalwe ngci ngenxa yabako-Israyeli. Akulamuntu owayephuma loba owayengena.

Joshua 6

1 IJerikho yayivalwe ngci ngenxa yabako-Israyeli. Akulamuntu owayephuma loba owayengena.

2 Ngakho uJehova wathi kuJoshuwa, “Khangelani, senginikele iJerikho ezandleni zenu, ndawonye lenkosi yayo lamabutho ayo.

3 Hambani libhode idolobho kanye lamadoda wonke ahlomileyo. Kwenzeni lokhu okwezinsuku eziyisithupha. 4 Abaphristi abayisikhombisa kabathwale amacilongo enziwe ngezimpondo zezinqama phansi kwebhokisi lesivumelwano. Ngosuku lwesikhombisa, hambani libhoda idolobho kasikhombisa, abaphristi bevuthela amacilongo. 5 Nxa lingabezwa sebetshaya amacilongo badonse, abantu bonke kabahlabe umkhosi; umduli wedolobho uzadilika abantu bahle bangene, yilowo lalowo aqonde phambili.”

6 Ngakho uJoshuwa indodana kaNuni wabiza abaphristi wathi kubo, “Thathani ibhokisi lesivumelwano sikaJehova kuthi abaphristi abayisikhombisa bahambe phambi kwalo bethwele amacilongo. 7 Waselaya abantu esithi, “Akuhanjwe! Hambani libhode idolobho, amabutho ahlomileyo ehamba phambi kwebhokisi lesivumelwano sikaJehova.”

8 Kwathi uJoshuwa esekhulume labantu, abaphristi abayisikhombisa ababethwele amacilongo ayisikhombisa phambi kukaJehova bahamba phambili bevuthela amacilongo, njalo ibhokisi lesivumelwano libalandela. 9 Amabutho ayehlomile ahamba phambi kwabaphristi ababevuthela amacilongo, njalo amabutho angemuva ayelandela ibhokisi. Ngaso sonke lesi isikhathi amacilongo ayekhala. 10 Kodwa uJoshuwa wayelaye abantu wathi, “Lingaze lahlaba umkhosi wempini, lingakhwezi amazwi enu, lingakhulumi lutho kuze kufike isikhathi engizalitshela ngaso ukuthi limemeze. Beselihlaba umkhosi.” 11 Ngakho ibhokisi lesivumelwano sikaJehova balithwala babhoda lalo idolobho, kanye. Abantu babuyela ezihonqweni bayalala khona.

12 UJoshuwa wavuka kusesele ngelanga elalandelayo njalo abaphristi bathwala ibhokisi lesivumelwano sikaJehova. 13 Abaphristi abayisikhombisa ababethwele amacilongo ayisikhombisa bahamba phambili bekhokhele ibhokisi lesivumelwano sikaJehova bevuthela amacilongo. Amadoda ayehlomile ayehamba phambi kwabo njalo amabutho angemuva ayelandela ibhokisi lesivumelwano sikaJehova, kukanti-ke amacilongo aqhubeka ekhala.

14 Ngosuku lwesibili babhoda idolobho kanye basebebuyela ezihonqweni. Bakwenza lokhu okwezinsuku eziyisithupha.

15 Ngelanga lesikhombisa bavuka emadabukakusa babhoda idolobho kasikhombisa ngendlela efanayo, ngaphandle kokuthi ngalelolanga babhoda kasikhombisa. 16 Ngokwesikhombisa, kwathi abaphristi bekhalisa amacilongo, uJoshuwa walaya abantu wathi, “Memezani! Ngoba uJehova useliphe idolobho.

17 Idolobho, lakho konke okukulo kuzakwahlukaniselwa uJehova. URahabi isifebe lalabo ahlala labo endlini yakhe yibo abazasindiswa, ngenxa yokuthi wafihla izinhloli esazithumayo. 18 Kodwa xwayani izinto ezahlukaniselwe ukubhujiswa, ukwenzela ukuthi lingazehliseli ukubhujiswa ngokuthatha okunye kwalezo zinto. Lokho kungenza ukuthi izihonqo zako-Israyeli zehlelwe luhlupho zitshabalaliswe njalo. 19 Sonke isiliva legolide lezinto zonke ezenziwe ngethusi langensimbi ezingcwele ziletheni kuJehova. Ngakho kumele zifakwe esiphaleni sakhe sengcebo.”

20 Kwathi amacilongo ekhala abantu bahlaba umkhosi; ekukhaleni kwecilongo, abantu sebehlaba umkhosi omkhulu, umduli wabhidlika, ngakho wonke umuntu wangena phakathi balithatha idolobho.

21 Balehlukanisela uJehova idolobho basebebhubhisa ngenkemba yonke into ephilayo eyayihlala kulo – amadoda labesifazana, abatsha labadala, inkomo izimvu labobabhemi.

22 UJoshuwa wakhuluma emadodeni amabili ayeke athunywa njengezinhloli zelizwe wathi, “Yanini endlini yesifebe liyesikhupha lezihlobo zaso zonke ligcwalise isifungo elasenza kuso.”

23 Ngakho amadoda asakhulayo ayenze umsebenzi wokuhlola angena akhupha uRahabi, uyise lonina labanewabo lazo zonke izihlobo zakhe. Bakhupha imuli yonke bayifaka endaweni eyayingaphandle kwezihonqo zako-Israyeli.

24 Basebetshisa idolobho lonke lakho konke okwakuphakathi kwalo, kodwa befake isiliva legolide lezinto ezilungiswe ngethusi lensimbi esiphaleni sengcebo yendlu kaJehova. 25 Kodwa uJoshuwa waphephisa uRahabi isifebe lemuli yakhe labo bonke abangabakhe ngenxa yokuthi wafihla amadoda ayethunywe nguJoshuwa ukuba zinhloli eJerikho – futhi ulokhu ehlala phakathi kwabako-Israyeli kuze kube lamhlanje.

26 Ngaleso isikhathi uJoshuwa wenza isifungo esiqinileyo esithi, “Ithukiwe phambi kukaJehova indoda ezimisela ukwakha kutsha lelidolobho, iJerikho: “Ngempilo yezibulo lakhe lendodana uzakwenza isisekelo; ngempilo yecinathunjana uzalungisa amasango alo.”

27 UJehova wayeloJoshuwa, udumo lwakhe lwanda elizweni lonke.